دوره فى السوفت وير على التويستر " الجزء الاول "

بسم الله الرحمن الرحيم

احب يكون اول موضوع ليا فى المنتدى الجميل ده بيتكلم عن اهم حاجه فى الموبيلات دلوقتى وهيه السوفت وير لان دلوقتى بقت مشاكل السوفت وير اكتر من مشاكل الصيانه وفى نفس الوقت ان السوفت يعتبر شغل دماغ اكتر منه شغل ايدين

وانا عن نفسى بحب جدا الشغل على التويستر وبنصح اى حد عايز يبدا شغل فى السوفت وخاصة فى النوكيا يجيب تويستر بالهارد وير كى احسن له من الجاف وغيره وده عن تجربه يارجاله والله مش من فراغ


وانا حبيت يكون الموضوع الاول مقدمه عن السوفت بس يعنى نعرف ايه هوه ؟ بيتكلم عن ايه؟ والحاجات دى اللى لازم نعرفها فى الاول عشان تكون اساسيات لينا نقف عليها بعد كده

اولا ...... انا اخوكم محمد جمال عبد الناصر من مصر محافظة بنى سويف مركز ناصر

احب اكون مساعد لاى حد عايز يتعلم سوفت وهارد ونغمات وغيره من اى حاجه تخص الموبايل

وصدقونى ياجماعه انا نفسى يكون المنتدى ده مع انه مش متخصص فى الموبايل بس نفسى يقدم حاجه جديده للمنتديات التانيه ويكون صغير الحجم وكبير الشان على شبكة الانترنت وده طبعا هيكون بجهدنا احنا

فيه ناس بتدخل تشوف اللى هيه عايزاه من غير حتى ما ترد رد واحد ولا حتى تسجل نفسها لكن فيه ناس بترد وتشترك وترد المعلومه بمعلومه واكتر وهوه ده الانسان اللى يستاهل بجد انه يكون فى المنتدى بتاعنا ده

مش معنى انك لسه مبتدا فى المجال ده معنى كده انك مش عارف ومش هينفع تدى معلومه صدقنى انا فى اوقات بستفاد من الزبون اللى بيجى المحل عندى مع انه يوزر وانت بروفيشنال لكن مش لازم نستصغر حد

انا عارف انى طولت عليكم اوى ندخل بقى فى المهم

وباذن الله هيكون الشرح بالتفصيل الممل وهيكون شرح عملى كمان والحاجات الناقصه طبعا هتيجى بالاسئله والتجربه من الساده الاعضاء ومن المشاكل اللى هتواجههم


الموبايل زى ما كلنا عارفين انه بورده وشاشه وشاسيه بمكوناته وطبعا السوفت اللى بيشغل كله ده وبيدى لكل واحد وظايفه وانا دايما بقول للزبون عندى ان السوفت ده زى الويندوز اللى بينزل على الكمبيوتر من غيره الكمبيوتر مش بيشتغل

الموبايلات بتاع زمان لو نفتكرها كانت اسمها الجيل الثالث اللى هيه زى 3310 5110 2100 3400 وكل الاجهزه اللى نسيناها ... الاجهزه دى فى برنامج التويستر اللى هنشوف صورته فى الدرس اللى جاى اسمها dct3 يعنى الجيل الثالث وفى الجيل ده كان فيه اى سى للصوت واى سى للشحن واى سى للباور والبورده كانت مليانه ايسيهات وكان فيه اى سى فلاش واى سى رام وهكذا عشان كده السوفت كان بينزل على اى سى الفلاش وكان بايدينا نغير السريال اللى موجود على الفلاش اللى هوه مكتوب على الشاسيه من ورا من غير اى مشاكل لكن بعد كده اى سى الشحن والباور والصوت انضموا مع بعض فى اى سى واحد اسمه اى سى اليو ام واليو ام ده عليه نفس السريال اللى علي اى سى الرام عشان كده لو هنغير رام يبقى نغير يو ام وعشان كده بقى من الصعب ومن المستحيل فى الاجيال اللى بعد الجيل الثالث اننا نغير السريال

على العموم انا عارف ان فيه ناس كتير تاهت فى الكلام اللى اتقال ده لكن والله كله ده هيبقى سهل بعد كده ويارب فى يوم تشرحه لناس تانيه وتفيد ناس كمان وكمان

فيه بوكسات كتير للنوكيا والموتوريلا والسامسونج وغيرها زى التويستر والجريفن والجاف وغيرها

انا عن نفسى هشرح باذن الله مادام ليا عمر التويستر وكل اللى عرفته فيه ولما ربنا يكرمنا باذن الله ونخلص التويستر ندخل على الجاف وهكذا وصدقونى الحاجات دى كلها سهله لكن اهم حاجه البدايه وبعد كده هتبقى زى الفل


على العموم انا اعتبرت ان الجزء الاول من الدوره دردشه بينا وبين بعض عشان يكون فيه اسلوب سلس فى التعامل مع بعض

ويارب ما اكون طولت عليكم

والايميل بتاعى لو فيه حد عايز يكلمنى mgnet20052000@yahoo.com 0126867078


الى اللقاء فى الموضوع القادم واول درس فى التويستر

طول عمرك وانت عسل ياروما والله وماتخفش مش معايا ورق غياب احنا هنقضيها كده زمايل فى زمايل


الف شكر على متابعتك ياصاحبى وسلمنى على محمد فضل وقوله المنتدى بجد رائع

محمد جمال عبد الناصر

الف شكر على مرورك الجميل والرائع مها ويارب تكونى استفدتى حاجه حتى لو مش هتشتغلى بيها زى ما بتقولى

بجد يسعدنى انى اشارك فى الرد وياريت تقبلنى تلميذه صغيرة معاك واشارك معاك فى باقى الدورة وبجد ربنا يوفقك وتزيدنا كمان

الف شكر على ردك ياتوتا ويشرفنى انك تكونى معانا فى الدوره واسف على التاخير فى باقى الدوره نظرا لظروف العمل ويارب اكون عند حسن ظنكم

شكرا على الدور دوره جميل و لذيذة